БЕРЛИН (АА) - Германската полиција уапси двајца мажи осомничени за поврзаност со терористичката организација ПКК и заплени повеќе парчиња огнено оружје и голема количина дрога, објавија денес медиумите, пренесува Анадолу.

Според дневниот весник „Билд“, истрагата започнала кога полицајците во источниот град Лајпциг запреле такси за време на рутинска сообраќајна проверка во саботата навечер.

Патникот, идентификуван како 23-годишниот Нуман К., се обидел да избега, но бил фатен. Полицајците пронашле пет нерегистрирани пиштоли од 9 мм со муниција во неговата чанта.

Потоа властите претресле стан што го делеле Нуман К. и вториот осомничен, 56-годишниот Метин Б., каде што откриле дополнително нерегистрирано оружје и повеќе од еден килограм кристален метамфетамин.

Надлежните ги истражуваат врските на осомничените со терористичката организација ПКК и дали можеби планирале терористички напади, особено во светлина на неодамнешните објави на Метин Б. на социјалните мрежи во кои ја поддржува ПКК и нејзиниот огранок ЈПГ, во североисточна Сирија.

Германските власти проценуваат дека ПКК и ЈПГ имаат повеќе од 15.000 активни следбеници во земјата, од кои многумина спроведуваат обемни пропагандни активности меѓу курдското имигрантско население. Германија ја забрани ПКК во 1993 година. Европол, агенцијата на ЕУ за спроведување на законот, ја класифицира како етнонационалистичка и сепаратистичка терористичка организација.