Ebad Ahmed
23 Мај 2024•Ажурирај: 24 Мај 2024
ПРАГА (АА) - По одлуката на Норвешка, Ирска и Шпанија да ја признаат Палестина како држава, данскиот Парламент во вторник ќе гласа за предлогот со кој се бара признавање на палестинската држава, објавија државните медиуми, пренесува Анадолу.
Според Данската радиодифузна корпорација, Трине Перту Мах, портпаролката за надворешни работи на опозициската Црвено-зелена алијанса, рече: „Владините партии, исто така, ќе имаат шанса да гласаат за ова на гласањето следната недела. И јас би сакала јасно да ја повикам Владата да го промени својот став и да ги следи Норвешка и другите европски земји.“
Предлогот е изнесен од Црвено-зелената алијанса, Социјал-либералите, Алтернатива и Социјалистичката народна партија.
Данската Влада јасно го кажа својот став дека нема да ја поддржи резолуцијата, како што рече министерот за надворешни работи Ларс Локе Расмусен: „За да се биде држава треба да имате територија над која имате контрола и одредени власти кои можат да ја контролираат. А не е баш таква ситуацијата во моментов.“
„Во моментов го имаме Хамас во Газа кој не го сака дводржавното решение. Имаме влада во Израел која исто така се чини дека нема голем апетит за дводржавното решение“, рече министерот за надворешни работи.
Реагирајќи на случувањата, портпаролката на Црвено-зелената алијанса рече дека единствен пат до траен мир е политичкиот пат.
„Започнува со признавање на Палестина како независна држава за двете страни да бидат поеднакви во преговорите што следуваат“, рече Мах.
Бидејќи Владата најави дека нема да го поддржи предлогот, практично е јасно дека нема очигледно мнозинство во данскиот Парламент што е за предлогот.
Норвешка, Ирска и Шпанија вчера објавија дека ќе ја признаат Палестина како држава, признавање што би стапило на сила на 28 мај.
Најавите на трите европски земји доаѓаат откако Израел ја продолжи својата брутална офанзива врз Појасот Газа, што започна по 7 октомври, и покрај резолуцијата на Советот за безбедност на Обединетите нации која повикува на итен прекин на огнот во опколената енклава.
Палестина е веќе признаена од осум европски земји: Бугарија, Полска, Чешка, Романија, Словачка, Унгарија, Шведска и администрацијата на кипарските Грци.
Над 35.700 Палестинци загинаа, главно жени и деца, а речиси 80.000 се повредени во израелските напади врз Газа што започнаа по прекуграничниот напад на Хамас.
По повеќе од седум месеци по почетокот на израелската војна, огромни делови од Газа се во урнатини, а наметната е и блокада на храна, чиста вода и лекови.
Израел е обвинет за геноцид пред Меѓународниот суд на правдата, кој му нареди да се погрижи неговите сили да не вршат акти на геноцид и да преземат мерки за да гарантираат дека хуманитарната помош ќе стигне до цивилите во Газа.
