Mohammad Sıo
06 Февруари 2025•Ажурирај: 07 Февруари 2025
ГАЗА (АА) - Палестинскиот градоначалник денес апелираше до меѓународната заедница да обезбеди 40.000 шатори и засолништа за раселените цивили во градот Рафа во јужниот дел на Појасот Газа, во услови на обилни врнежи и силен ветер, известува Анадолу.
Раселените Палестинци поминаа тешка ноќ во Појасот Газа, откако лошото време донесе обилни дождови и силен ветер, кои ги поплавија шаторите и уништија многу од нив, продлабочувајќи ги нивните страдања во и онака тешките хуманитарни услови.
„Ситуацијата во Рафа достигна катастрофално ниво, со десетици илјади луѓе кои спијат на отворено под силен дожд и силни ветрови кои ги уништија нивните дотраени шатори, оставајќи ги ранливи на студ, глад и болести“, наведе во изјавата градоначалникот Ахмед ал-Суфи.
Тој додаде дека 90 % од станбените единици во Рафа се целосно уништени во текот на 15-темесечното израелско бомбардирање.
„Околу 52.000 единици беа делумно оштетени, поради што градот не можеше да ги прими погодените жители, без одржливо решенија за домување во блиска иднина“, посочи Ал-Суфи.
Тој предупреди дека градот Рафа ‘повеќе не е погоден за живеење’.
„Ситуацијата секојдневно се влошува без вистинска меѓународна интервенција за да се спасат Палестинците од опасноста од раселување, глад и болести“, нагласи Ал-Суфи.
Градоначалникот на Рафа ги повика Обединетите нации, хуманитарните организации и меѓународните тела да обезбедат ‘барем минимум неопходни средства за достоинствен живот пред катастрофата да се претвори во трагедија што не може да се контролира’.
„Меѓународната заедница мора веднаш да дејствува за да обезбеди 40.000 шатори и засолништа за раселените Палестинци во градот, кои останаа без покрив над главата од израелската окупација“, истакна А-Суфи, и додаде:
„Рафа умира, а секое одложување на адекватен одговор е смртна казна за илјадници семејства кои изгубија сè“.
Според Канцеларијата за медиуми на Владата на Газа, израелската војска уништила речиси 88 % од инфраструктурата на Појасот Газа за време на израелската војна, вклучувајќи куќи, витални објекти и јавни услуги.
Првата шестнеделна фаза од договорот за прекин на огнот стапи на сила на 19 јануари, со што беше запрена израелската геноцидна војна во Појасот Газа, во која од 7 октомври 2023 година се убиени повеќе од 47.400 Палестинци, главно жени и деца, а повредени се повеќе од 111.000.
Меѓународниот кривичен суд издаде налози за апсење во ноември минатата година за израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата поради неговата војна во палестинската енклава.
