Германија: Медиумите ја критикуваа Владата поради издавањето на предупредување за патување во Турција

БЕРЛИН

Германските медиуми ги критикуваа Владата на оваа земја и Европската Унија (ЕУ) поради издавањето предупредување за патувања во Турција, која успешно се бори против пандемијата на Ковид-19, и порачаа дека зад таквото предупредување не стојат здравствени, туку политички причини, јавува Агенција Анадолија (АА).

Иако води успешна борба против ширењето на коронавирусот и според здравствените капацитети спаѓа во редот на најразвиените земји на светот, Турција сепак се најде на листата на земји што Германија и Европската Унија (ЕУ) ги сметаат за несигурни за патувања во текот на пандемијата.

Истакнати германски медиуми тврдат дека тоа е показател дека Турција е во право кога на Германија и на Европската Унија (ЕУ) им замерува што кон неа се однесуваат со двојни стандарди.

Весникот „Ди Велт“ (Die Welt) пишува дека германската Влада, под плаштот на пандемијата на Ковид-19, се обидува да води игра против Турција поради сосема други цели.

Од оваа медиумска куќа сметаат дека предупредувањето за патување во Турција во потполност е нелогично.

Истиот извор потсети на изјавата на шефот на турската дипломатија, Мевлут Чавушоглу, кој рече дека сертифицирањето на туристичките комплекси во Турција го извршила германската компанија ТУВ (TUV) и дека оваа компанија врши надзор на превентивните епидемиолошки мерки.

„Ди Велт“ исто така наведе дека Чавушоглу во Берлин рекол дека германската Влада треба да ја ревидира одлуката за предупредување за патувањата во Турција бидејќи како сигурни за патување ги прогласила земјите кои имаат исклучително тешка епидемиолошка слика и претставуваат европски епицентар на пандемијата, а од весникот сметаат дека Чавушоглу тука мислел на Велика Британија.

„Во надворешната политика во текот на пандемијата на Ковид-19 здравствената реалност е на второ место“, тврдат германските медиуми.

И медиумската куќа „Редакционснетсверк Дојчланд“ (RND) тврди дека Турција е во право кога ги критикува Берлин и Брисел поради предупредувањето за патувањата во Турција.

Истакнувајќи ја неопходноста од додатно појаснување за предупредувањето за патување во Турција, РНД тврди дека германската Влада во спротивно ќе биде соочена со критика дека предупредувањето за патување го злоупотребила против Турција.

„Таквото однесување не може да биде чесно, ниту политички паметно. Политичките несогласувања со Турција не можат да се решаваат преку грбот на луѓето кои патуваат на летување“, се наведува во веста на РНД.