Во текот на протестите во Алжир повредени 112 полицајци

АЛЖИР (AA) - Во текот на протестите во Алжир, на кои демонстрантите бараа повлекување на кандидатурата на актуелниот алжирски претседател Абделазиз Бутефлика, повредени се 112 полицајци, а уапсени се 195 лица, јавува Anadolu Agency (AA).

Протестите се одржани вчера, првенствено во главниот, но и во другите алжирски градови.

Претседателските избори во Алжир ќе се одржат на 18 април, а кандидатура за изборите предадоа вкупно 15 кандидати. Оваа африканска земја влезе во своевидна политичка криза поради повторната кандидатура на актуелниот претседател Абделазиз Бутефлика кој е на чело на државата од 1999 година.

Опозицијата и илјадници демонстранти се противат на кандидатурата на 82-годишниот Бутефлика кој пред шест години претрпе тежок мозочен удар и кој ретко се појавува во јавноста.

Бутефлика е хоспитализиран во болница во швајцарската Женева, а неговата кандидатура ја предаде шефот на неговата кампања, Абдулгани Залан.

Фактот што Батефлика лично не го предаде барањето за кандидатурата предизвика додатни полемики во Алжир.

Залан изјави дека Батефлика е подготвен, во случај на победа на изборите, веќе наредната година да распише предвремени избори на кои не би бил кандидат.

Опозициските лидери сметаат дека Батефлика, поради здравствените проблеми веќе не е ниту физички способен да биде на чело на државата.

Батефлика кандидатурата може да ја повлече до објавувањето на конечната листа на претседателските кандидати кое е најавено за 13 март.