Во нападот врз претседателската палата во Чад загинаа 19 лица

ЈАУНДЕ (АА) - Најмалку 18 вооружени лица загинаа, а девет се повредени при обидот синоќа да упаднат во претседателската палата во главниот град на Чад, јавија локалните медиуми, пренесува Анадолу.

Нападот се случи во населбата Џамбал Бахр во Нџамена, каде имаше судир меѓу обезбедувањето на палатата и вооружените напаѓачи.

Престрелката, која траела околу еден час, била ставена под контрола од безбедносните сили до 21:30 часот по локално време.

За време на нападот загинал и владин функционер.

Идентитетот на напаѓачите не е откриен, а одредени извори шпекулираат дека нападот можеби го извршила терористичката организација Боко Харам, но нема потврда од официјалните претставници.

Владата на Чад го карактеризира нападот како „обид за државен удар“.

Не е откриено каде се наоѓал претседателот Махамат Идрис Деби Итно за време на нападот.

На видеата што кружат на социјалните мрежи се гледаат напаѓачи облечени во цивилна облека.

Претходниот претседател Идрис Деби Итно почина во април 2021 година додека ја водеше операцијата против сепаратистичката организација Фронт за промени во Чад (FACT) на северот на земјата.

Неговата смрт предизвика период на транзиција, при што неговиот 37-годишен син Махамат Идрис Деби Итно го презеде раководството со Воениот преоден совет.

Во текот на следните месеци Махамат Деби вети дека ќе се одржат избори по 18-месечна транзиција и дека власта ќе им биде предадена на цивилите. Но во октомври 2022 година Националниот форум за дијалог го продолжи периодот на транзиција за уште две години, дозволувајќи му на Махамат Деби да се кандидира за претседател на изборите во 2024 година.

Тој беше избран за претседател откако на изборите на 6 мај освои 61 отсто од гласовите.

На 28 ноември Владата на Чад објави раскинување на договорот за соработка во областа на безбедноста и одбраната со Франција.

Одредени француски трупи почнаа да се повлекуваат од Чад на 10 декември и претседателот Деби потврди дека сите француски сили ќе бидат целосно повлечени до 31 јануари 2025 година.