Израелски дронови летаат над неколку градови во Јужен Либан

ИСТАНБУЛ (АА) - Беспилотните летала на израелската армија утринава беа забележани како летаат над неколку градови во Јужен Либан, со што повторно се прекрши израелско-либанскиот прекин на огнот и на денот на важната парламентарна седница на која треба да се избере претседател, јавува Анадолу.

Според државната Либанска национална новинска агенција, од рано изутрина израелските армиски беспилотни летала летаат над делови на областа Набатије.

Новото прекршување од Израел се случи неколку часа пред либанскиот Парламент да се состане на специјална седница за да се избере долгоочекуваниот претседател, чие место е празно веќе две години.

Откако мандатот на претседателот Мишел Аун заврши на 31 октомври 2022 година, либанскиот Парламент не успеа да избере нов претседател на 12 седници.

Либанскиот радиодифузер објави дека имало 19 израелски прекршувања на примирјето со што од 27 ноември примирјето било прекршено повеќе од 400 пати, при што загинаа 32 Либанци и беа повредени 39 лица.

Договорот за прекин на огнот беше со цел да се стави крај на 14-месечните борби меѓу израелската армија и групата Хезболах од почетокот на војната во Газа во октомври 2023 година.

Според условите за прекин на огнот, од Израел се бара да ги повлече своите сили јужно од Сината линија, во фази, а либанската армија треба да се распореди во Јужен Либан во рок од 60 дена.

Податоците од либанското Министерство за здравство покажуваат дека во нападите на Израел врз Либан, кои започнаа на 8 октомври 2023 година, убиени се најмалку 4.063 лица, вклучително жени, деца и здравствени работници, а 16.664 се повредени.