Во израелските напади врз Газа загинаа уште 92 Палестинци, од 7 октомври вкупно 30.320

АНКАРА (АА) – Најмалку 92 Палестинци загинаа, а 156 се повредени во израелските напади во последните 24 часа врз опколениот Појас Газа, соопшти денес Министерството за здравство на енклавата, јавува Анадолу.

„Израелската окупација изврши 10 масакри врз семејства во Појасот Газа, оставајќи 92 загинати и 156 повредени во текот на изминатите 24 часа“, истакна Министерството.

„Многу луѓе сѐ уште се заробени под урнатините и на патиштата бидејќи спасувачите не можат да стигнат до нив“, додаде Министерството.

Отворено непочитувајќи ја привремената пресуда на Меѓународниот суд на правдата, Израел продолжува со нападите врз Појасот Газа каде што се убиени најмалку 30.320 Палестинци, главно жени и деца, а 71.533 се повредени од 7 октомври, според палестинските здравствени власти.

Израел започна напади врз Појасот Газа по прекуграничниот напад на Хамас.

Според Обединетите нации, израелската војна против Газа принуди 85 отсто од населението внатрешно да се расели, предизвика постојан недостиг на храна, чиста вода и лекови, додека 60 отсто од инфраструктурата на енклавата е оштетена или уништена.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за да се гарантира влез на хуманитарна помош за цивилите во Газа.

Меѓутоа, непријателствата продолжија со ненамалено темпо, а испораките на помош остануваат недоволни за решавање на хуманитарната катастрофа.