Во напади на режимот во Источна Гута загинаа 167 цивили

ИСТОЧНА ГУТА/ИСТАНБУЛ (АА) - Најмалку 167 цивили загинаа во нападите на силите на сирискиот претседател Башар ал-Асад, извршени во последните два дена на подрачјето на Источна Гута, Сирија, јавува Anadolu Agency (AA).

Асадовите сили и нивните поддржувачи, од вчера изутрина извршуваат копнени и воздушни напади во населбите во Источна Гута. Според податоците на Цивилната заштита, вчера загинаа 88, а денес 79 цивили.

Поради постојаните напади, постои загриженост дека бројот на загинати во текот на денот би можел да се зголеми. Во Источна Гута, која е под контрола на опозицијата, живеат околу 400.000 цивили. Ова подрачје со договорот во Астана е прогласено за зона без судири.

И покрај тоа, припадниците на режимот на Асад, чија земја-гарант е Русија, од април минатата година ја интензивираа опсадата, а во последните неколку месеци и нападите. Хуманитарната криза во Источна Гута од ден на ден расте, а на илјадници цивили им е потребна евакуација.

Поголемиот дел од цивилите на кои им е потребна итна евакуација се деца и луѓе заболени од карцином чија болест е во поодминат стадиум.

Освен тоа, многу деца во Источна Гута починаа поради глад и немање можност за пристап до лекување. Фархан Хак, заменик портпаролот на ОН, изјави дека се појавиле и заразни болести како туберкулоза и тифус, и дека поради недостатнок на вакцини се загрозени 600 деца на тоа подрачје.