Во Израел продолжуваат протестите поради незадоволството од Владата на Нетанјаху

ЕРУСАЛИМ (АА) - Илјадници жители на Израел, и покрај карантинот прогласен поради Ковид-19, одржаа протест против лошото менаџирање на Владата на премиерот Бенјамин Нетанјаху со кризата на пандемијата, пренесува Агенција Анадолија (АА).

Според веста објавена во весникот „Једиот Ахронот“ (Yediot Ahronot), илјадници луѓе во различни градови, меѓу кои и Тел Авив, одржаа демонстрации со барање да се ревитализира економијата која е погодена од Ковид-19.

Демонстрантите ги сметаат Нетанјаху и неговата влада за одговорни за влошување на економската состојба во земјата, сиромаштијата и невработеноста.

Полицијата им се закануваше на демонстрантите со приведување, нагласувајќи дека демонстрациите се противзаконски, додека демонстрантите во Тел Авив извикуваа пароли со кои бараа прекинување на карантинот кој предизвика влошување на економијата во земјата.

Во Израел веќе над четири месеци се одржуваат протести на кои се бара оставка од Нетанјаху поради лошото менаџирање со пандемијата на Ковид-19, како и за судскиот процес за корупција против него.

Израелскиот Парламент го усвои Нацрт-законот во врска со ограничувањето на демонстрациите за време на карантинот.