Американскиот сенатор Грахам: Ќе направам сè што е во моја моќ за поддршка на продажбата на Ф-16 на Туркије

ИСТАНБУЛ (АА) - Американскиот сенатор Линдзи Грахам рече дека ја поддржува одлуката на администрацијата на Бајден за продажба на борбените авиони Ф-16 на Туркије, јавува Агенција Анадолија (АА).

Грахам ја посети Туркије за време на викендот, каде што на 2 јули се состана со портпаролот на Кабинетот на турското Претседателство, Ибрахим Калин.

Според соопштението на турското Претседателство, двајцата претставници разговарале за билатералните односи помеѓу САД и Туркије, борбата против тероризмот, соработката во одбранбената индустрија, војната помеѓу Украина и Русија, испораките на жито преку Црното Море, како и за други регионални прашања.

Соработката во полето на одбраната и постигнувањето прогрес за прашањето за Ф-16 ќе служат на интересите на двете земји, се наведува во соопштението.

По состанокот, Грахам на Твитер напиша дека имал многу продуктивно патување во Туркије, која, како што истакна, е „членка на НАТО и ценет американски сојузник“.

„Иако понекогаш имавме проблематични односи, императив е Туркије и САД да преземат чекори за зајакнување на односите помеѓу двете нации“, напиша Грахам на Твитер.

„Јас ќе направам сè што е во моја моќ да ја поддржам одлуката на администрацијата на Бајден за продажба на Ф-16 на турските воздухопловни сили“, рече тој.

Тој додаде дека борбените авиони ќе ја поткрепат турската Војска што, како што рече, „дефинитивно е во националните безбедносни интереси на Америка“.

Турската Влада ги побара авионите Ф-16 и опрема за модернизирање во октомври во 2021 година. Договорот од 6 милијарди долари би вклучил продажба на 40 нови борбени авиони Ф-16 и опрема за модернизирање на моделите 80 модели на F-16 C/D кои турските воздухопловни сили ги имаат во инвентарот.