Администрацијата на Бајден одобри продажба на оружје на Саудиска Арабија во вредност од 650 милиони долари

ВАШИНГТОН (АА) - Администрацијата на американскиот претседател Џо Бајден ги извести законодавците дека одобрила продажба на ракети воздух-воздух на Саудиска Арабија во вредност од 650 милиони долари, што е првата продажба на оружје на администрацијата на Бајден на Кралството, пренесува Агенција Анадолија (АА).

„Ријад побара 280 АИМ-120Ц-7/Ц-8 напредни проектили воздух-воздух со среден дострел (AMRAAM) и 596 ракетни лансери ЛАУ-128 (MRL), како и опрема за поддршка како што се резервни и поправни делови“, се вели во соопштението на Агенцијата за безбедносна соработка. Стејт департментот го потпиша барањето.

„Предложената продажба ќе ја подобри способноста на Саудиска Арабија да одговори на сегашните и идните закани со зголемување на залихите на ракети со среден дострел за нејзината флота на борбени авиони за нејзината национална одбрана“, соопшти агенцијата на Пентагон, истакнувајќи дека продажбата ќе ја зајакне саудиската флота на „Јурофајтер тајфун“, борбени авиони Ф-15Ц/Д, Ф-15С и Ф-И5СА.

Од Агенцијата се наведува дека „Рајтеон“ ќе биде главен испорачател на ракетите воздух-воздух.

Со известувањето на администрацијата до законодавците започна 30-дневниот период на ревизија на Конгресот, во кој демократите на Бајден ќе изразат приговори. Демократите гласно се спротивставија на напорите да му се помогне на Кралството со оглед на воздушната кампања на Ријад во Јемен, која беше проследена со кршење на правата, како и поради убиството на колумнистот на „Вашингтон пост“, Џамал Кашоги.

Конгресот може да ги блокира или измени одобрените продажби со донесување закон во кој било момент пред да се затвори 30-дневниот период.

Истражувачкиот институт на Конгресот наведува дека евентуалниот обид законски да се изманеврира претседателот ќе треба да осигура дека секој закон за блокирање или измена на продажбата има доволно поддршка за да се отфрли веројатното претседателско вето. Оттаму велат дека ниту една продажба на оружје досега не била успешно запрена со тој метод.