Израелско Министерство за одбрана: Од првиот ден на војната во Газа добивме 1.000 тони оружје

ИСТАНБУЛ (АА) - Израел денес откри дека добил најмалку 1.000 тони оружје од почетокот на војната во Газа на 7 октомври, а американската воена поддршка за Тел Авив е во тек, јавува Анадолу.

Министерството за одбрана соопшти дека израелскиот одбранбен естаблишмент денес го примил 45-от товарен авион.

„Пристигнати се околу 1.000 тони оружје за зајакнување на капацитетите на израелските одбранбени сили - ИДФ“, се наведува во соопштението, без да се открие кои се изворите на испорака на оружјето за Израел.

Соопштението е издадено откако Вашингтон му даде воена поддршка на Тел Авив во војната против палестинската група на отпорот Хамас. Американскиот претседател Џо Бајден рече дека в петок ќе испрати „итно барање за буџет“ за финансирање на потребите на американската национална безбедност за да ги поддржи клучните партнери, вклучувајќи ги Израел и Украина.

„Залихите вклучуваат и воено возило на брза помош, медицинска опрема и разни други ресурси со цел јакнење на способноста“, се наведува во соопштението на израелското Министерство.

Газа се соочува со тешка хуманитарна криза, без струја, а водата, храната, горивото и медицинските материјали се при крај.

Конфликтот во Газа, која е под израелско бомбардирање и блокада од 7 октомври, започна кога Хамас ја почна операцијата „Поплава Ал Акса“, повеќестран ненадеен напад со низа лансирања на ракети и инфилтрирање во Израел по копно, море и воздух. Се наведува дека операцијата е одмазда за упадите во џамијата „Ал Акса“ и зголеменото насилство од страна на израелските доселеници.

Потоа израелската војска ја започна операцијата „Железни мечеви“ кон позициите на Хамас во Појасот Газа.

Според податоците на Министерството за здравство, бројот на загинати во Газа за време на израелските бомбардирања порасна на 4.137, а бројот на повредени на 13.300, додека повеќе од 1.000 луѓе се водат како исчезнати.