БРИСЕЛ (АА) – Европската Унија (ЕУ) треба да е подготвена да стапи во контакт со Русија во иднина, но сега не е вистински момент за тоа, изјави денес претседателот на Европскиот совет, Антонио Кошта, нагласувајќи дека сегашниот фокус на блокот останува на поддршката за Украина и одржувањето на притисокот врз Москва, пренесува Анадолу.

Во интервјуто за платформата „Европска њузрум“, цитирано од агенцијата „Белга“, Кошта изјави дека секој евентуален дијалог со Русија мора да биде фокусиран на европската безбедност и праведен мир во Украина, а не на енергетските прашања.

„Засега нашиот главен придонес е зголемувањето на економскиот притисок врз Русија“, изјави тој, додавајќи дека ЕУ ќе продолжи да ја поддржува Украина „со сите достапни средства“.

Коста, исто така, ја повтори посветеноста на Европската Унија за намалување на зависноста од руските енергенти и потврди дека не се во тек никакви преговори со Москва поврзани со енергентите.

Неговите изјави следуваат по коментарите за време на викендот на белгискиот премиер Барт де Вевер, кој сугерираше дека на крајот Европа треба да ги нормализира односите со Русија, истовремено зајакнувајќи ги воените капацитети и граничната одбрана.

Де Вевер се соочи со критики и на домашен и на меѓународен план. Тој го бранеше својот став, велејќи дека нормализацијата може да се случи само по мировен договор што е прифатлив за Украина и за ЕУ.

Кошта дополнително се осврна на тензиите меѓу Украина и Унгарија во врска со блокираната финансиска помош од ЕУ, која е поврзана со гасоводот „Дружба“. Иако ја нагласи важноста на обновувањето на работата на гасоводот, тој го осуди секое заплашување на лидерите на ЕУ и повика на брзо решавање на спорот.

Украина ги прекина испораките преку гасоводот „Дружба“ по инцидентот на 27 јануари, за кој беше обвинета Русија. Унгарија и Словачка ја обвинија Украина за намерно блокирање на пратките, со цел да добие политичко влијание и, како одговор на тоа, оттогаш ги суспендираа испораките на дизел-гориво за Украина.