СКОПЈЕ (AA) – Европскиот парламент истакна дека Албанија и Црна Гора поставиле амбициозни цели за завршување на преговорите за членство во Европската Унија (ЕУ) до 2026, односно 2027 година и дека ЕУ треба да ги поддржи овие земји кога нивната амбиција е придружена со опипливи реформи, пренесува Анадолу.

Во усвоениот извештај европратениците нагласуваат дека проширувањето на блокот е стратегиски одговор на геополитичката реалност и важна инвестиција за безбедноста и стабилноста на ЕУ, повикувајќи го Советот да го признае овој замав и да ги отстрани сите пречки од страна на ЕУ.

Тие, исто така, побараа брзо отворање на преговарачките поглавја со Украина и Молдавија.

Европратениците нагласија дека процесот на пристапување треба и натаму да се базира врз заслуги, почитувајќи ги вредностите и основните принципи на ЕУ, вклучително и владеењето на правото, демократските слободи, правата на малцинствата и борбата против корупцијата.

Во извештајот, исто така, се потенцира важноста на мониторингот на реформите во земјите кандидати и поддршката за про-ЕУ граѓански организации, како и потребата од соодветно финансирање пред членството и подлабока соработка во инфраструктурата, безбедноста и борбата против странски манипулации со информации.

Извештајот беше усвоен со 385 гласа „за“, 147 „против“ и 98 воздржани, додека известувачот Петра Ауштревичус изјави дека проширувањето на ЕУ треба да оди рака под рака со внатрешни реформи за подобрување на функционирањето на Унијата и процесите на донесување одлуки.