Швајцарија предупреди за присуство на токсинот цереулид во бебешка формула

ЖЕНЕВА (АА) – Бебешката формула од неколку производители во Швајцарија е контаминирана со токсинот цереулид и не треба да се консумира, предупреди Швајцарската федерална канцеларија за безбедност на храната и ветеринарство, јавува Анадолу.

Канцеларијата, позната по германскиот акроним ОСАВ, соопшти дека станува збор за бебешка формула од различни производители, вклучително и некои производи што се продаваат под брендовите БЕБА, Алфамино, Бимбосан, Аптамил и Бејбибио.

„Поради сложеноста на меѓународните синџири на снабдување, во моментов не е целосно исклучено дека и други производи ќе бидат вклучени“, се вели во соопштението на ОСАВ.

Агенцијата соопшти дека е во близок контакт со одговорните за системите за рано предупредување на Европската Унија и Светската здравствена организација за брзо идентификување на какви било дополнителни контаминирани производи.

Надлежните соопштија дека се пријавени неколку симптоми на болест и дека ја испитуваат можната поврзаност со повлечените производи.

ОСАВ ги повика родителите да не ги користат повлечените производи од Нестле, Хохдорф Свис Нутришн, Росман, Данон и Мигрос.

Цереулидот е токсин произведен од одредени бактерии и може да предизвика симптоми, како што се гадење, повраќање и дијареја, соопшти Канцеларијата. Обично симптомите се појавуваат во рок од пет часа од консумирањето и траат помеѓу шест и 24 часа.

Токсинот е високо отпорен на топлина и не се уништува со готвење, предупреди ОСАВ.

Надлежните, исто така, оценуваат дали нивоата на контаминација со цереулид во повлечените производи ја надминале акутната референтна доза на Европската агенција за безбедност на храната и претставуваат опасност.

„Ова прашање моментно е под истрага“, соопшти Канцеларијата.