„Прекинот на огнот меѓу Израел и палестинските групи пред Рамазан е императив“

АНТАЛИЈА (АА) - Египетскиот министер за надворешни работи Самех Шукру денес изјави дека прекинот на огнот меѓу Израел и палестинските групи на отпорот би требало да биде постигнат пред светиот исламски месец на постот Рамазан, јавува Анадолу.

„Императив е да се постигне прекин на огнот пред Рамазан за безбедноста на палестинскиот народ“, изјави министерот за АА за време на неговото прво учество на Дипломатскиот форум во Анталија, Туркије.

Тој нагласи дека „би било неприфатливо воените активности да продолжат“ за време на Рамазан поради „влијанието што ќе го има не само врз палестинските цивили во Газа и на Западниот Брег, туку и воопшто“.

Министерот повтори дека неговата земја отфрла какви било планови за раселување на Палестинците.

„Прашањето за раселување, кое е спротивно на меѓународното хуманитарно право, не треба да продолжи да се одолговлекува, ниту внатре, ниту надвор од Палестина“, рече тој.

Тој смета дека раселувањето на Палестинците е начин за „ликвидирање на палестинското прашање“, додавајќи дека „тоа не е прифатливо и е кршење на меѓународното хуманитарно право“.

Тој нагласи дека неговата земја „ќе продолжи да ги вложува сите напори“ за прекин на огнот.

„Се надеваме дека ќе постои неопходна флексибилност и разбирање за опасностите и потребата од прекин на непријателствата со цел да се зголеми обемот на хуманитарна помош, да се отстранат заканите за раселување, но првенствено, тоа се животите на палестинскиот народ кои мора да се спасат“, додаде тој.