İlayda Çakırtekin
14 Октомври 2025•Ажурирај: 18 Октомври 2025
ИСТАНБУЛ (АА) – Францускиот претседател Емануел Макрон ги смета двата поднесени предлога за недоверба на повторно именуваната Влада на Себастијен Лекорну како „предлози за распуштање“, соопшти владината портпаролка Мод Брежон денес, јавува Анадолу.
„Тој забележа дека се поднесени два предлога за недоверба, што значи дека некои не сакаат да учествуваат во дебатата и потсети дека овие предлози во суштина се иницијативи за распуштање и треба така да се гледаат“, рече Брежон на редовниот брифинг.
„Макрон, укажувајќи на 'фрагментираната' политичка слика, повика на 'воздржаност, примерен однос и институционална стабилност', нагласувајќи ја и важноста на 'компромисот'“, нагласи таа.
Според портпаролката, Лекорну сака да покаже дека Владата е „способна за дејствување“, но дека нема да постапува „непромислено“.
Лекорну, кој се согласи дека Франција се соочува со „политичка криза“, но не и со „криза на режимот“, истакна дека наредната недела ќе биде клучна.
Брежон предупреди дека доколку ситуацијата не се стабилизира, „распуштањето ќе стане неизбежно“, јави телевизијата БФМ.
„Политичките сили не треба да се плашат да се вклучат во буџетската дебата. Особено во овој голем момент на промени, кој ја исклучува употребата на член 49.3. Ова е апсолутно без преседан. Ќе имаме можност да дебатираме за сè и на крајот Парламентот ќе гласа. Затоа, мојата порака до нив е: Учествувајте“, вели таа.
Таа најави дека политичкиот говор на премиерот, закажан за денес околу 15 часот по локално време, ќе биде „говор на разјаснување“ за буџетот за 2026 година, кој ќе се фокусира на поголем придонес од најбогатите, но и на поддршка за раст и вработување.
Десничарската партија Национален собир (RN) и левичарската Непокорена Франција (LFI) вчера поднесоа предлози за недоверба на Владата, а Социјалистичката партија најави дека и таа ќе го стори тоа доколку не бидат исполнети нејзините барања.
Макрон повторно го назначи Лекорну за премиер во петокот, четири дена по неговата оставка.
Тој првично беше назначен на функцијата откако Франсоа Бајру изгуби во гласањето за доверба во Националното собрание на 8 септември.
Бајру, кој во јули ја претстави буџетската рамка за 2026 година, бараше поддршка за план за заштеда на речиси 44 милијарди евра (51 милијарда долари) како дел од напорите за намалување на зголемениот јавен долг на Франција, кој сега изнесува 115% од нејзиниот БДП.
Неуспехот да се постигне договор за буџетот за 2025 година минатата година доведе и до пад на Владата на Мишел Барние откако левичарските и десничарските партии заеднички ѝ изгласаа недоверба.
