ИСТАНБУЛ (АА) - Ирак соопшти дека го намалува производството на сурова нафта поради намалениот и прекинат извоз откако Иран го затвори Ормутскиот Теснец во услови на ескалација на регионалните тензии, јавува Анадолу.

Ирачкото Министерство за нафта синоќа соопшти дека намалувањето на производството нема да влијае врз работата на рафинериите ниту врз континуираното производство на нафтени деривати што се неопходни за задоволување на домашните потреби.

„Сите рафинерии во јужниот, централниот и северниот регион работат континуирано со полн капацитет за производство на различни нафтени производи, обезбедувајќи доволни количини за секојдневна локална употреба и складирање на евентуалниот вишок“, се наведува во соопштението.

Иранскиот Корпус на исламската револуционерна гарда (ИРГЦ) денес соопшти дека Ормутскиот Теснец е затворен за пловидба и предупреди дека бродовите што ќе се обидат да го преминат ќе бидат цел на напади, по американско-израелските напади врз земјата.

Ормутскиот Теснец, кој се наоѓа на излезот од Персискиот Залив, го поврзува извозот на нафта и течен природен гас од Блискиот Исток со глобалните пазари преку Арапското Море и Индискиот Океан.

Големите производители, вклучително Саудиска Арабија, Обединети Арапски Емирати, Кувајт, Ирак и Катар, во голема мера зависат од овој морски премин.

Европските пазари, како и водечките азиски економии, како Кина, Индија, Јапонија и Јужна Кореја, исто така, зависат од него за увоз на енергенти.

Потегот на Техеран следуваше откако САД и Израел во саботата започнаа со големи напади врз Иран, при што, според ирански извори, убиени се речиси 800 лица, меѓу кои и врховниот лидер ајатолахот Али Хаменеи.

Техеран возврати со напади со беспилотни летала и ракети врз Израел, како и врз земји од Заливот во кои се наоѓаат американски воени бази.