„Израел изврши геноцид во Газа“, утврди Истражната комисија на ОН

ЖЕНЕВА (АА) - Израел изврши геноцид врз Палестинците во Појасот Газа, соопшти Независната меѓународна истражна комисија на ОН за окупираните палестински територии, вклучувајќи го и Источен Ерусалим, и Израел, се наведува во извештајот објавен денес, јавува Анадолу.

Комисијата ги повика Израел и сите држави да ги исполнат своите законски обврски според меѓународното право за „да го запрат геноцидот и да ги казнат одговорните за него“.

По две години истраги за настаните од 7 октомври 2023 година, Комисијата заклучи дека израелските власти и безбедносните сили извршиле „четири од пет“ геноцидни дела дефинирани според Конвенцијата од 1948 година за спречување и казнување на кривичното дело геноцид - убивање, предизвикување сериозни телесни или ментални повреди, намерно попречување на условите за живот со цел целосно или делумно уништување на Палестинците и наметнување мерки наменети за спречување на раѓањата.

Експлицитните изјави на израелските цивилни и воени власти и моделот на однесување на израелските безбедносни сили укажуваат дека геноцидните акти биле извршени „со намера да се уништат, целосно или делумно, Палестинците во Појасот Газа како група“, се вели во извештајот.

Според Нави Пилај, претседателката на Комисијата, одговорноста за свирепите злосторства лежи кај „израелските власти од највисоките ешалони кои оркестрираа геноцидна кампања речиси две години со специфична намера да ја уништат палестинската група во Газа“.

Пилај нагласи дека Израел „флагрантно ги игнорирал наредбите за привремени мерки од Меѓународниот суд на правдата и предупредувањата од земјите членки, канцелариите на ОН, организациите за човекови права и групите на граѓанското општество“ и дека властите „немале намера да го променат својот тек на дејствување“.

Израелската Армија продолжи со бруталната офанзива врз Појасот Газа, при што од октомври 2023 година уби речиси 65.000 Палестинци. Воената кампања ја опустоши енклавата, а експертите прогласија глад таму.