Израел вели дека е подготвен за војна која би била погубна за Хезболах и Либан

БЕЈРУТ (АА) - Израел е подготвен за војна на северот што ќе биде „погубна“ и за Хезболах и за Либан, изјави израелскиот министер за одбрана Јоав Галант, јавува Анадолу.

„Подготвени сме за војна, и на крајот, кога нашето трпение ќе се намали, ќе треба да преземеме силна акција за да завладее мир на северните граници заради безбедност на израелските жители“, рече Галант на воениот состанок во северниот град Хаифа за процена на подготвеноста на израелскиот внатрешен фронт доколку избие војна со либанската група.

„Можноста за постигнување политичко решение со Либан истекува, и како резултат на тоа, може да завршиме со воена акција“, изјави Галант, пренесе израелскиот весник „Једиот ахронот“.

За изјавите на Галант сѐ уште нема коментар од Либан или Хезболах.

Тензиите се разгореа по должината на границата меѓу Либан и Израел со наизменична размена на оган меѓу израелските сили и Хезболах во најсмртоносните судири откако двете страни водеа војна во 2006 година.

Пограничните тензии дојдоа во време на израелската воена офанзива во Појасот Газа по прекуграничниот напад на палестинската група Хамас на 7 октомври.