ВАШИНГТОН (АА)

Американците повеќе не сакаат да гледаат како се убиваат палестински деца во Појасот Газа, изјави американскиот независен сенатор Берни Сандерс, јавува Анадолу.

„Американскиот народ, според мое мислење, без разлика каква е вашата политика, не сака да биде соучесник во убиството на децата кои се бомбардирани до смрт додека спијат“, рече Сандерс.

Тој додаде дека американскиот народ не сака да продолжи да ја финансира војната на израелскиот премиер Бенјамин Нетанјаху.

„Мислам дека можеби е време да почнеме да го слушаме американскиот народ“, рече Сандерс во Сенатот.

Тој нагласи дека верува оти постои многу „анксиозност во срцата и душите на американскиот народ“ низ Соединетите Американски Држави (САД) поради она што се случува во Газа.

„Без разлика дали сте конзервативен републиканец, дали сте независен, дали сте прогресивен, луѓето не сакаат да гледаат како стотици илјади деца умираат од глад додека камионите со храна се паркирани на неколку милји подалеку“, рече тој.

Сандерс ја критикуваше и американската воена поддршка за Израел.

„Американскиот народ не сака да види дека долгогодишниот американски сојузник Израел користи американско оружје и опрема за да ја блокира испораката на американска хуманитарна помош, што е спротивно на законот“, рече тој.

„На секоја земја што ја блокира американската хуманитарна помош треба да ѝ се прекине финансирањето“, нагласи Сандерс.