Хрватскиот претседател Милановиќ: Армијата нема да оди во никакви мисии во Украина

Хрватскиот претседател Зоран Милановиќ изјави дека Армијата на земјата нема да учествува во никакви мисии во Украина, јавува Анадолу.

Претседателот Милановиќ, кој престојуваше во официјална посета на Црна Гора, во главниот град Подгорица се сретна со својот црногорски колега Јаков Милатовиќ.

Давајќи оцена за средбата на својот профил на социјалните мрежи, Милановиќ уште еднаш повтори дека хрватските војници во никој случај нема да одат во Украина.

„Хрватската Армија нема да оди на никаква мисија (во Украина). Ова во потполност не е возможно. Една од најважните причини за ова е што таа мисија нема да се одвива, со или без Хрватска“, истакна Милановиќ.

Истакнувајќи дека Владата може да обезбеди финансиска или воена помош за Украина доколку смета дека е потребно, Милановиќ изјави дека тој е одговорен за одбраната на својата земја.

И хрватскиот министер за одбрана Иван Анушиќ изјави дека неговата земја нема да брза во „Коалицијата на доброволци“ и дека на дневен ред не е прашањето за испраќање војници во Украина.

Министерот Анушиќ изјави дека доколку бидат испратени војници во Украина, тоа ќе биде во рамките на мировна мисија, а одлуката ќе ја донесат претседателот Милановиќ, премиерот Андреј Пленковиќ и Парламентот.

Денеска во Париз, главниот град на Франција, се одржува самитот „Коалиција на доброволци“.