Вељаноски го свика Собранието, предложено одложување на изборите без нов датум

СКОПЈЕ (АА) - По денешната одлука на Уставниот суд, спикерот Трајко Вељаноски го свика Собранието, а на дневен ред на седницата е изменување на Изборниот законик, по скратена постапка, со која се бришат членовите каде се предвидува одржување на предвремени парламентарни избори на 5 јуни, јавува Anadolu Agency (AA).

Предлог законот за изменување на Изборниот законик е поднесен од координаторот на пратеничката група на ДУИ Талат Џаферии и тој не содржи нов датум за одржување на предвремените парламентарни избори.

Во предложениот текст се наведува дека со предложените решенија во Изборниот законик нема да се предвиди точниот датум на одржување на предвремени избори за пратеници.

Нов датум за избори не се предвидува и засега ова е единствена точка на дневниот ред на седницата.

Претходно денеска Уставниот суд на седница едногласно одлучи да поведе постапка за оценување на уставноста и законитоста на Одлуката за распуштање на Собранието на Република Македонија од 18 јануари 2016 година и Одлуката за изменување на Одлуката за распуштање на Собранието од 23 февруари 2016 година. Притоа, уставните судии донесоа и времена мерка со која се запираат сите изборни дејства.

Вељаноски информираше дека како претседател на Собранието на Република Македонија, имајќи го во предвид решението на Уставниот суд и врз основа на сопствените надлежности дефинирани со Уставот на државата, за денеска во 16 часот ја закажува 101 седница.

"Истовремено, го изразувам и своето силно уверување дека единствено преку постојано надоградување на меѓусебните односи помеѓу сите релевантни чинители во државата, на најдобар можен начин ќе се помогне во насока на остварување на носечките македонски стратешки приоритети какви што несомнено се, членството во НАТО и ЕУ, унапредувањето на стратешките односи со САД, како и создавањето на сите неопходни претпоставки за економски, социјален и сеопшт развој на Македонија", нагласи Вељаноски.