СКОПЈЕ (АА) - Шпанскиот град Каравака де ла Круз од 1 до 3 мај станува сцена на еден од највпечатливите и највозбудливите традиционални настани во регионот – фестивалот „Вински коњи“ (Los Caballos del Vino), јавува Анадолу.

Со овој уникатен обичај, кој е дел од поголемите свечености во чест на Вистинскиот крст (Santísima y Vera Cruz), се прославува вековната врска меѓу коњите, виното и верата.

Центар на вниманието на фестивалот се убаво украсените коњи, облечени во раскошни везени наметки, кои со голема брзина трчаат низ уличките на Каравака, водени од групи млади мажи.

Настанот има и натпреварувачки карактер – тимовите се борат за најбрзо и највпечатливо претставување, а илјадници посетители го следат спектаклот со возбуда и аплаузи.

Потеклото на „Вински коњи“ се поврзува со легенда од 13 век, кога витезите успеале да донесат вино до замокот под опсада во градот, користејќи коњи за да го спасат населението од жед и болести.

Денес оваа традиција е призната и од УНЕСКО како нематеријално културно наследство на човештвото.