Регулаторот за лекови на ЕУ ќе го оценува новиот лек за Ковид-19

БРИСЕЛ (АА) - Европската агенција за лекови (ЕМА), регулатор за лековите на Европската Унија (ЕУ), почна да го оценува новиот лек против Ковид-19 на компанијата „ГлаксоСмитКлајн“, пренесува Агенција Анадолија (АА).

Според соопштението од ЕМА, компанијата поднела барање за добивање одобрение за продажба во ЕУ на моноклоналното антитело „xevudy“, кое содржи сотровимаб.

Известено е дека процесот за оценување на барањето е започнат, а резултатот се очекува да излезе за релативно кратко време, за околу два месеци, бидејќи претходно се направени прелиминарни оценки.

Се наведува дека лекот е развиен за употреба кај возрасни во случаи кога постои ризик од влошување на болеста при третман на Ковид-19.

Доколку ЕМА смета дека придобивките од лекот се поголеми од ризиците, ќе ја извести Комисијата на ЕУ дека е одобрен за продажба. Конечното одобрение за продажба ќе го даде Комисијата на ЕУ.