Премиерот на Русија, Мишустин, соопшти дека состојбата во земјата постепено се подобрува

МОСКВА

Премиерот на Русија, Михаил Мишустин, изјави дека состојбата во земјата предизвикана од пандемијата на новиот тип коронавирус (Ковид-19), почнала постепено да се подобрува, јавува Агенција Анадолија (АА).

Премиерот Мишустин, по состанокот што го одржа со лицата задолжени за борбата со Ковид-19 изјави дека последните три дена е забележано намалување на бројот на детектирани лица заразени со новиот тип коронавирус.

Мишустин, истакнувајќи дека за првпат процентот на детектирани лица позитивни на Ковид-19 паднал под 3%, додаде: „Денеска за првпат бројот на оздравени лица ја надмина бројката на новозаразени на дневно ниво.“

Посочувајќи дека започнал да се намалува товарот врз здравствениот систем, Мишустин истакна: „Ваквата слика е показател дека ситуацијата постепено се подобрува.“

- Ограничувањата се укинуваат во 14 региони

Премиерот Мишустин истакна дека се создадени потребните услови за постепено укинување на ограничувањата воведени во 17 региони, и додаде „Во рамките на првата фаза донесени се соодветни одлуки, според кои во 14 од 17 региони ограничувањата ќе бидат укинати.“

Последните 24 часа во Русија Ковид-19 е детектиран кај 8.764 лица, со што вкупниот број на лица позитивни на новиот тип коронавирус изнесува 308.705. Од последици на заразеност со Ковид-19 во последното деноноќие починаа 135 лица, со што вкупниот број на смртни случаи во земјата е зголемен на 2.972. Во Русија бројот на новооздравени изнесува 9.262, а вкупниот број на оздравени пациенти изнесува 85.392.