На конференцијата Глобален одговор на пандемијата собрани донации во износ од 7,4 милијарди евра

БРИСЕЛ

Претседателката на Европската комисија Урсула вон дер Лејен соопшти дека на денешната конференција Глобален одговор на пандемијата на Ковид-19 биле собрани вкупно 7,4 милијарди евра за поддршка на развојот на лекот и вакциата против Ковид-19, јавува Агенција Анадолија (АА).

„Светот денес покажа дека е обединет во борбата против Ковид-19. Учесниците ветија дека ќе донираат вкупно 7,4 милијарди евра за потребите на развојот на дијагностиката, лекувањето и вакцина против Ковид-19“, изјави Вон дер Лејен.

Истакнувајќи дека е покрената невидена соработка на глобален план, Вон дер Лејен изрази голема благодарност до научниците и истражувачите кои трагаат по решение на проблемот со пандемијата.

Станува збор за собир кој Европската комисија го организираше денес преку видео-конференција со цел собирање 7,5 милијарди евра.

Конференцијата е организирана во согласност со апелот на Светската здравствена организација (СЗО), а турскиот претседател Реџеп Таип Ердоган им се обрати на учесниците со видео-порака, во која рече дека вакцината треба да биде во сопственост на целото човештво и дека Турција ќе го објави износот на својата донација до 23 мај.

На учесниците им се обрати и претседателот на Франција Емануел Макрон кој зборуваше за важноста на напорите идната вакцина да биде достапна за сите во светот.

Германската канцеларка Ангела Меркел рече дека денешната конференција е момент на надеж каде лидерите можат да се фокусираат на вистинска мултилатерална соработка и надвор од пандемијата.

Европската унија вети милијарда евра, Германија 525 милиони евра (547 милиони долари), а Франција вети донација од 500 милиони евра (546 милиони долари) за потребите за развој на лек и вакцина против Ковид-19.

Меѓу останатите донатори се Јапонија која вети 762 милиони евра, Канада 551 милион, Саудиска Арабија 457 милиони, Велика Британија 441 милион, Швајцарија 350 милиони, Мексико 274 милиони и Австрија 205 милиони евра.

Во наредните денови се очекува зголемување на собраната сума на пари, а конференцијата ја поддржаа голем број земји од светот, со исклучок на САД кои не учествуваа.