Директорот на СЗО за Европа: „Бројот на смртни случаи од Ковид-19 во Европа надмина милион, ситуацијата е сериозна“

ЖЕНЕВА (АА) - Директорот на Светската здравствена организација (СЗО) за Европа, Ханс Клуге, истакна дека минатата недела бројот на лица кои починале во Европа поради епидемијата на коронавирусот (Ковид-19) надминал еден милион, и додаде дека секоја недела се регистрираат 1,6 милиони нови случаи на заразени, јавува Агенција Анадолија (АА).

„Ситуацијата во нашиот регион е сериозна. Секоја недела се регистрираат 1,6 милиони нови случаи. Тоа се 9.500 луѓе на час или 160 лица во минута“, истакна Клуге на онлајн прес-конференцијата на која присуствуваше и грчкиот министер за здравство Василис Кикилиас.

Наведувајќи дека досега во Европа се користени 7 вида вакцини против Ковид-19 и вкупно 171 милиони дози, Клуге рече дека приближно 13 проценти од европската популација примиле една доза и 6 проценти ја примиле втората доза од вакцината.

Клуге рече дека смртните случаи од Ковид-19 кај луѓе постари од 80 години во регионот од февруари постепено се намалуваат, достигнувајќи 30 проценти, што е најниско ниво од почетокот на епидемијата.

Посочувајќи дека добиваат извештаи за тоа дека капацитетите на одделите за интензивна нега во болниците низ Европа, вклучувајќи ја и Грција се надминати, Клуге истакна дека хоспитализацијата исто така останува на високо ниво.

Меѓу другото тој изјави дека во Франција приемите во болниците и одделенијата за интензивна нега поради Ковид-19 ги ​​достигнале највисоките нивоа од почетокот на епидемијата.

Клуге наведе дека повеќе од 100.000 бегалци и мигранти во Грција се дел од националната стратегија за вакцинација, и додаде: „Кампањите за масовна вакцинација во бегалските кампови во Грција се планирани следниот месец.“