Златна шолја за чај вредна 65.000 долари украдена од стоковна куќа во Јапонија

ИСТАНБУЛ (АА) - Златна шолја за чај вредна околу 10 милиони јени (65.000 долари) беше украдена вчера од стоковна куќа во Токио, пренесува Анадолу.

Властите во моментов трагаат по виновникот, објави јапонската државна телевизија НХК (NHK).

Полицијата соопшти дека шолјата од цврсто злато била прикажана на промотивен настан за златни предмети на 8-миот кат од познатата продавница на Такашимаја во областа Нихонбаши во Токио.

Шолјата била поставена во витрина, но била оставена отклучена.

На снимката од надзорните камери се гледа машко лице како ја зема шолјата и ја става во својот ранец.

Властите рекоа дека лицето изгледало како да е на возраст од 20 до 30 години, носело очила, сив дуксер, црни панталони и сив ранец.

И покрај присуството на обезбедување во просторот каде што се одржувал промотивниот настан, кражбата е забележана дури 20-тина минути откако се случила.