Abdula Berisha
19 Декември 2019•Ажурирај: 20 Декември 2019
СКОПЈЕ (АА) - Република Северна Македонија потпиша договори за финансирање на проекти од областа на земјоделството и образованието со германската државна банка за развој „КфВ“ (KfW), јавува Агенција Анадолија (AA).
Министерката за финансии на Северна Македонија, Нина Ангеловска, министерот за земјоделство, шумарство и водостопанство, Трајан Димковски, министерот за образование и наука, Арбер Адеми, директорот на Секторот за енергија и транспорт на „КфВ“ (KfW) за ЈИЕ и Турција, Пабло Обрадор, и заменик-амбасадорот на СР Германија, Ото Граф, потпишаа договори за програмата за наводнување на Северна Македонија и за Проектот за енергетска ефикасност на студентските домови.
Министерката Ангеловска рече дека со проектот во областа на земјоделството се очекува да се обезбеди вода до 14.000 хектари насади, додека со проектот во областа на образованието ќе се подобрат условите на 7 државни студентски домови, кои ќе бидат и енергетски ефикасни.
„Програмата за наводнување има вредност од 110,7 милиони евра. Од нив, 80 милиони евра се заем од германската банка „КфВ“ со рок на отплата од 15 години и вклучен грејс период од 5 години. Дополнително, банката обезбедува гранд од 2,8 милиони евра, а 27,9 милиони евра се учество на Република Северна Македонија. Со вториот проект, којшто го споменавме, инвестираме во студентските домови, во реновирање на соби, санитарни инсталации, обнова на електрична опрема и безбедносни мерки. Заемот за овој проект е во износ од 20 милиони евра и договорот за гранд е во износ од 4,7 милиони евра“, рече Ангеловска.
Министрите за земјоделство и образование изразија задоволство од потпишаните договори. Димковски рече дека со овие капитални инвестиции во областа на земјоделството ќе се подобри квалитетот и ќе се зголеми земјоделската продуктивност. Адеми рече дека инвестирањето во 7 студентски домови во различни градови во земјата значително ќе ги подобри условите за студентите.
Директорот на Секторот за енергија и транспорт на „КфВ“ за ЈИЕ и Турција, Пабло Обрадор, во својот говор рече дека досега главно биле склучени договори за финансирање на обновливи извори на енергија и заштита на животната средина, потенцирајќи дека договорот потпишан за студентските домови е првиот што го потпишуваат во областа на енергетската ефикасност.
„Ние сме многу среќни што со оваа програма отвораме нов прозорец на можности каде што мислиме дека ќе има многу што да се направи во наредните години. Во однос на програмата за наводнување, сметаме дека со оваа програма, како што е веќе прикажано во првата фаза, ќе имаме значително влијание врз економијата на регионот“, рече Обрадор.
