ИСТАНБУЛ (АА) – Во Истанбул започна 9. Истанбулски економски самит, со главна тема „Нови рамнотежи и глобална соработка“, на кој ќе учествуваат бизнис-лидери од Турција и светот, претставници од академската фела и од различни сектори, јавува Анадолу.

Самитот ќе се одржува два дена со серија „B2B“ сесии и состаноци на кои ќе се дискутира за глобалната економија, енергетиката, индустријата, телекомуникациите, финансиите, образованието, дигиталната трансформација и меѓународните инвестиции.

Министерката за финансии на Северна Македонија, Гордана Димитриеска-Кочоска, зборуваше на отворањето на самитот, нагласувајќи дека светскиот поредок значително се менува поради геополитичките ризици, енергетските предизвици и економските шокови што обликуваат нова глобална архитектура.

Таа истакна дека економските и политичките односи се развиваат со невидена брзина и дека „секоја земја, без оглед на нејзината големина, мора да го редефинира својот економски модел“.

„Новата глобална рамнотежа нема да се формира спонтано. Ќе ја обликуваат земјите што поседуваат визија, храброст и капацитет да ги гледаат глобалните промени како можности, динамика и придобивки“, нагласи Димитриеска-Кочоска.

Министерката рече дека традиционалните економски мерки повеќе не се доволни во неизвесна глобална средина и дека земјите треба да се фокусираат на политики што создаваат стабилност, ја зголемуваат довербата и го поттикнуваат растот. Таа нагласи дека економиите се меѓусебно поврзани и дека координираните активности се поефикасни од индивидуалните пристапи.

Зборувајќи за приоритетите на Северна Македонија, Димитриеска-Кочоска рече дека цел на земјата е да изгради динамична, конкурентна и одржлива економија што привлекува инвестиции и произведува додадена вредност.

Според неа, реформите во финансиските институции и јавните финансии треба да се темелат врз три столба: зголемување на фискалната одржливост, поддршка на продуктивните инвестиции во приватниот сектор и зголемување на ефикасноста и транспарентноста во јавната потрошувачка.