Претседателот Џафери по повод Светскиот ден на Ромите, оствари средба со претставници на ромската заедница

СКОПЈЕ

Претседателот на Собранието на Северна Македонија, Талат Џафери, денеска одржа средба со пратеничката Љатифе Шиковска и претставници на невладините организации од заедницата на Ромите по повод одбележувањето 50 години од Меѓународниот ден на Ромите, пренесува Агенција Анадолија (АА).

По повод 8 Април- Светскиот ден на Ромите, претседателот Џафери оствари средба со Љатифе Шиковска, пратеничката од ромската заедница, Зоран Димов, претседател на Интернационалната ромска група, Ферат Асан, стопанственик од општина Шуто Оризари и Мухамед Точи, претставник од НВО „Месечина“ – Гостивар.

Според соопштението од Кабинетот на претседателот Џафери, на почетокот на средбата гостите му врачија на претседателот Џафери свечен документ именуван како „Заложба за интеграција на Ромите во сите сфери на општественото живеење“, како и Плакета за особен придонес.

Од друга страна, претседателот Џафери, пак, им врачи честитка по повод Денот од негово име и од име на пратениците на Собранието.

Џафери, подвлекувајќи дека оваа година, поради пандемијата, одбележувањето на Меѓународниот ден на Ромите е во поинаква форма, потсети на искуството од Декадата на Ромите и на долгогодишната соработка со претставниците на ромската заедница кои биле активни политички и институционални чинители.

Претседателот Џафери, исто така нагласи дека настојувал да даде придонес за унапредување на позицијата на Ромите во општеството.

Пратеничката Љатифе Шиковска, според соопштението, се заблагодари за укажаната чест и сподели со претседателот Џафери впечатоци од остварената средба со претседателот и претставниците на Владата и од плодната дискусија во однос на процесите на инклузија и искажа оптимизам дека напредокот на ромската заедница, иако е бавен процес, сепак се движи по нагорна линија.

Зоран Димов, претседател на Интернационалната ромска група, со претставување на своето лично и професионално портфолио, потврди дека работи на подобрување на позицијата на Ромите на целиот Западен Балкан и е отворен за секаква соработка што би била од интерес на ромската заедница.

- Ромите во Северна Македонија

Припадниците на ромската заедница се дел од Уставот од 2001 година, признаени како посебна етничка заедница. Според Пописот од 2002 година, во Северна Македонија живеат околу 53.879 Роми или 2,66 % од вкупното население, а некои невладини организации, повикувајќи се на своите истражувања, велат дека оваа бројка е поголема.

Во општината Шуто Оризари, во која Ромите се мнозинско население, ромскиот јазик е официјален. Според наводите на ромските претставници, оваа општина е единствена во Европа чиј градоначалник е Ром. Освен во оваа општина, од 85 општини во земјата, во 50 живеат припадници на ромската заедница. Ромскиот јазик е службен и во општина Куманово.

Денот е прогласен официјално во 1990 година во Сеороцк, Полска, на местото каде што се одржа четвртиот Светски ромски конгрес на Меѓународната ромска унија, во спомен на првата меѓународна средба на ромските претставници одржан во Челсфилд, во близина на Лондон, од 7 до 12 април 1971 година.