Претседателот на Албанија Илир Мета упати честитка по повод Денот на независноста на Северна Македонија

ТИРАНА

Претседателот на Албанија, Илир Мета, и претседателот на албанскиот Парламент, Грамоз Ручи, упатија честитки по повод 8. Септември - Денот на независноста на Северна Македонија, пренесува Агенција Анадолија (АА).

Претседателот Мета испрати честитка до неговиот колега Стево Пендаровски, нагласувајќи дека пријателството и соработката меѓу Албанија и Северна Македонија се проширени низ сите области и се во служба на одличните соседски односи меѓу двете земји, и на интересите и иднината на граѓаните.

„Потполно верувам дека нашите заеднички и постојани напори на процесот за членство во Европската Унија (ЕУ) на нашите земји успешно ќе ги надминуваат предизвиците кои го оспоруваат и спречуваат постигнувањето на оваа цел, толку важна за иднината на нашите граѓани и на регионот“, нагласи Мета во својата честитка објавена на социјалните мрежи.

Мета рече дека иднината на соработката меѓу двете соседни земји ќе биде успешна благодарение на добрите меѓуетнички односи меѓу Албанците и Македонците, кои според него се пријателски мостови и вредности кои треба да се заштитат, поддржуваат и промовираат.

Од друга страна, во соопштението на Парламентот на Албанија се наведува дека претседателот на Парламентот, Ручи, испратил честитка до претседателот на Собранието на Северна Македонија, Талат Џафери.

„На овој посебен ден, посакувам Република Северна Македонија да напредува на нејзиниот пат кон консолидирање на демократијата, зголемувањето на благосостојбата на граѓаните и европската интеграција. Посебна честитка до албанските браќа кои живеат во Република Северна Македонија и до нивниот незаменлив придонес во развојот, прогресот и европското патување на вашата земја“, се вели во честитката на Ручи.