Над 3,7 милиони гласачи ќе имаат право на глас на претседателските избори во Хрватска

Право на глас на претседателските избори во Хрватска на 29 декември ќе имаат 3.762.221 гласач, јавува Анадолу.

Со решение на министерот за правда, администрација и дигитална трансформација, Дамир Хабијан, денес е затворен избирачкиот список за претседателските избори.

На списокот има 92.526 гласачи помалку отколку на претседателските избори пред пет години и 11.000 помалку од изборите за хрватскиот Сабор во април.

Од вкупниот број гласачи, оние со место на живеење во Хрватска се 3.512.226, од кои 6.879 претходно регистрирани, кои ќе гласаат во странство.

Без живеалиште во Хрватска активно се регистрирани 249.995 гласачи, било по службена должност или по лично барање.

Во изборната трка за претседател на Хрватска учествуваат осум кандидати: Миро Буљ (Мост), Томислав Јоњиќ (независен), Ивана Кекин (Можемо), Бранка Лозо (Домино), актуелниот претседател Зоран Милановиќ (СДП и партнерите), Драган Приморац (ХДЗ и партнерите), независната кандидатка Марија Селак Распудиќ и независниот кандидат Нико Токиќ Картело.

За да биде избран за претседател во првиот круг, кандидатот мора да освои апсолутно мнозинство од сите дадени гласови. Доколку ниту еден кандидат не освои мнозинство гласови во првиот круг, двајцата кандидати со најголем процент на гласови одат во вториот круг на изборите, кој ќе се одржи две недели по првиот. Во вториот круг за победник се прогласува кандидатот кој ќе добие најмногу гласови.

Мандатот на претседателот трае пет години.