ЗАГРЕБ (АА) - Претседателот на Република Хрватска, Зоран Милановиќ, денеска во Пула ја коментира ситуацијата во соседна Босна и Херцеговина (БиХ), критикувајќи ги потезите на хрватскиот премиер Андреј Пленковиќ, велејќи дека ситуацијата во БиХ е сериозна, јавува Агенција Анадолија (АА).

Милановиќ, меѓу другото, во изјава за медиумите при посетата на Пула даде коментар и за улогата на премиерот Пленковиќ, изјавувајќи дека ќе му аплаудираат во Ливно, но потоа нема да му аплаудираат во Брисел, затоа што мора да дојде таму и да се поклони.

На прашањето на новинарите како ситуацијата во Босна и Херцеговина може да ја загрози безбедноста на Хрватска, имајќи предвид дека претседателот Милановиќ претходно ѝ предложи на хрватската Влада состанок на Советот за национална безбедност за октомвриските избори во БиХ, Милановиќ рече:

„Да речеме дека има бунт во Босна и Херцеговина, дека Хрватите се отцепуваат или прогласуваат трет ентитет. Па се закануваат со тоа. За мене тоа е екстремно, тоа е ултимативна варијанта, за која јас, покрај ваков кутар човек од премиер, ќе треба да ги поддржам. Го правам ова за да се избегне тоа.“

Оцени дека во тој случај луѓето уште повеќе би се иселувале од БиХ, а во најголем дел би доаѓале во Хрватска.

„Ситуацијата е многу сериозна, за среќа, сите се разоружани. Беше многу сериозна и во февруари 2014 година кога отидов во Мостар и ги видов хрватските институции на западниот брег на Мостар како горат. Тие беа запалени од борци за демократија, демократи, како комунисти и фашисти“, истакна Милановиќ.

Предупреди дека ова е безбедносен проблем кој може да се повтори и дека Хрватите во БиХ „не би можеле да се одбранат“.

„Порака до хрватската левица: време е да се биде на вистинската страна. Имате бесплатно возење, можете да се шлепате покрај мене и да си одите кога сакате. Заштитете ги тие луѓе долу. Спречете го проширувањето на НАТО, само за да се слушне нашиот глас. Финска е безбедна, Русија нема да ја нападне. Русија запна во Украина и тоа ќе трае“, рече Милановиќ.

Хрватскиот претседател оцени дека во меѓународната политика Скандинавците се третираат „како повисоки квалитети и раси“ во однос на Албанија и Северна Македонија.

Претседателот Милановиќ ѝ предложи на Владата на Република Хрватска да одржи состанок на Советот за национална безбедност, но Владата на Република Хрватска на чело со премиерот Андреј Пленковиќ сѐ уште не одговори на неговото барање. Исто така, Милановиќ рече дека очекува хрватскиот Парламент да стави вето на влезот на Финска во НАТО додека не се реши прашањето за статусот на Хрватите во БиХ.