Gökhan Balcı
04 Ноември 2024•Ажурирај: 06 Ноември 2024
ЕДРЕНЕ (АА) - Во турскиот град Едрене се одржа Конгрес на балкански теолози и филозофи, од каде е порачано дека е неприфатливо исламскиот свет да не реагира адекватно на геноцидот што го извршува ционистичкиот Израел во Газа, известува Анадолу.
Конгресот беше организиран од Фондацијата на исламски теолози и филозофи, а домаќин на настанот беше Универзитетот Тракија.
На собирот присуствуваа муфтии, теолози и филозофи од Северна Македонија, Косово, Албанија, Србија, Босна и Херцеговина, регионот Санџак, Бугарија, Романија, Словенија, Црна Гора и од Крим.
Завршната декларација на крајот на средбата ја презентираше претседателот на Фондацијата на исламски теолози и филозофи, проф. д-р Насрула Хаџимуфтуоглу, кој рече дека на Конгресот силно е нагласено братството на Анадолија и Балканот.
„Нашиот свет се соочува со криза на хуманост. Глобалните сили ги погазија основните човечки вредности стекнати со векови и без да покажат обѕир, ги занемарија универзалните морални принципи, правилата на меѓународното право и институциите, искористувајќи ја неорганизираноста на муслиманите. Исламскиот свет поради тоа ја почувствува најголемата штета во политичка, социјална и економска смисла“, истакна Хаџимуфтуоглу.
Тој нагласи дека „императив е исламските теолози и филозофи да ја подигнат јавната свест и да се фокусираат на конкретни истражувања со цел да влијаат врз ставовите и однесувањата на домашните и меѓународните носители на одлуки во насока на правдата“.
- Геноцид во Газа
Хаџимуфтуоглу рече дека западниот свет спроведува „глобална хегемонија“.
„Неприфатливо е исламскиот свет да не реагира на адекватен начин на геноцидот што ционистички Израел со поддршка на империјалистичките сили го извршува во Газа и пред заканите и опасностите што Израел ги претставува во регионот, и сето тоа пред очите на целиот свет кој не ги презема неопходните чекори за да го запре ова угнетување“, рече Хаџимуфтуоглу.
Тој нагласи дека затоа е „императив меѓународната заедница веднаш да преземе иницијатива со сите расположливи ресурси по ова прашање“.
- Семејство, училиште и општество
Хаџимуфтуоглу посочи дека невладините организации, институции и организации на исламскиот свет треба да ја покажат неопходната чувствителност да ги заштитат правата на муслиманите кои произлегуваат од меѓународното право и да го спречат кршењето на правата.
Тој додаде дека муслиманите треба да бидат внимателни кон империјалистичките и ориенталистичките проекти што ги спроведуваат доминантните сили преку етничките структури и верски групи за да ги постигнат сопствените амбиции во исламскиот свет.
„Во тој контекст, активностите за подигање на свеста би требало да бидат насочени кон семејството, училиштето и општеството. Исламските теолози и филозофи, како и лидерите на јавното мислење би требало да се фокусираат на активности кои ќе ја зголемат репрезентативната моќ на муслиманите, но и ќе одговорат на антирелигиозните и исламофобични ставови во земјите во коишто живеат и на целото човештво ќе му го објаснат исламот на соодветен јазик“, рече Хаџимуфтуоглу.
