ЗЕНИЦА (АА) - До жуборливата Пошќанска Река и патеката по која секојдневно минуваат посетителите на пикник-зоната Појске, во близина на Зеница, се наоѓа џамија што привлекува внимание со необично скромните димензии, тоа е една од најмалите функционални џамии во Босна и Херцеговина, пишува Анадолу.

Џамијата, со површина од само 16 квадратни метри и специфичен внатрешен и надворешен изглед, е изградена во 2023 година на иницијатива на локалниот жител Амир Дајиќ, а реализирана со несебична поддршка од локалната заедница.

Се наоѓа веднаш до пикник-зоната Појске, а со текот на времето стана место каде што патниците и излетниците можат да извршуваат дневни молитви. Поради малите димензии, во џамијата истовремено може да се молат до десет луѓе.

Локалниот жител Мирзет Скопљак вели дека идејата произлегла од практична потреба.

„Димензиите на џамијата се четири на четири. Изградена е во овие димензии бидејќи нејзина главна намена е минувачите да се молат. Денес најчесто ја користат патници, посетители на пикник-зоната Појске или минувачи што сакаат да извршат пропуштена молитва“, вели Скопљак.

Тој истакнува дека реакциите на мештаните и посетителите се исклучително позитивни и дека се благодарни што имаат место каде што може да се молат.

Скопљак додава дека се зголемува интересот за посета на оваа џамија.

„Досега забележавме неколку илјади посети“, вели Скопљак, истакнувајќи дека џамијата го привлекува вниманието на посетителите не само од локалните области туку и од цела БиХ и пошироко.

„Луѓето доаѓаат од цела БиХ, но и од Германија, Франција, САД, Турција и други земји“, нагласи тој.