Грција обезбеди трајно засолниште за 35 граѓани на Авганистан кои престојуваа во Северна Македонија

СКОПЈЕ (АА) – Триесет и пет граѓани на Авганистан кои привремено престојуваа во Северна Македонија денеска заминаа за Грција која им обезбеди трајно засолниште, пренесува Агенција Анадолија (АА).

„Групата ја сочинуваат активисти за човекови права и женски права и членови на нивни семејства“, се вели во соопштението на Владата на Северна Македонија, и се потсетува дека во изминатиот период Северна Македонија им обезбеди привремено засолниште како дел од големата меѓународна операција за помош на вработени во хуманитарните, демократски и миротворни меѓународни мисии, активисти од организациите за човекови права, преведувачи, студенти и стипендисти и нивни семејства од Авганистан, кои се под закана на новата талибанска власт во земјата.

Во земјава престојуваат 407 граѓани од Авганистан.

„Институциите, во текот на нивниот престој им ја пружаат целата потребна поддршка додека не се обезбеди трансфер до нивната крајна дестинација. Трошоците во целост се покриени од меѓународните организации“, се нагласува во соопштението од Владата.