Alma Dekovic
24 Септември 2023•Ажурирај: 24 Септември 2023
ПРИШТИНА (АА) - Еден косовски полицаец е убиен, а друг е ранет утринава во напад извршен во селото Бањска кај Лепосавиќ, потврди премиерот на Косово, Албин Курти, пренесува Анадолу.
Курти на социјалната мрежа Фејсбук објави дека е убиен припадник на регуларната полиција, додека ранетиот е од граничната полиција на Косово и тој е вон животна опасност.
Косовскиот премиер наведе дека престрелката се случила околу 3 часот наутро и додаде дека станува збор за огнени оружја од различни калибри.
„Напаѓачите се професионалци кои носеле маски и биле вооружени со тешко оружје. Го осудуваме овој криминален и терористички напад. Организираниот криминал со политичка, финансиска и логистичка поддршка на официјален Белград, ја напаѓа нашата земја. Во оваа борба ние ги браниме и почитуваме законите, ги штитиме своите граѓани без разлика и ја браниме независноста на Косово“, напиша Курти на Фејсбук.
Тој додаде дека извршителите и нивните налогодавачи ќе „паднат, ќе бидат приведени, процесуирани и казнети.“
„Владата на Република Косово и државните институции се подготвени и во координација за да одговорат на злосторствата и злосторниците, тероризот и терористите. Косовската полиција го информираше семејството на А. Б. за неговата смрт. Ранетиот полицаец е вон животна опасност. Изразуваме сочувство на семејството и на сите поради загинатиот полицаец. На ранетиот му посакуваме брзо и целосно закрепнување“, порача Курти.
Полицијата на Косово потврди дека нападот врз нејзините припадници се случил во северниот дел на земјата, во раните утрински часови.
Во полициското соопштение се наведува дека нападот почнал со поставување на два камиони без регистерски таблички на мостот пред влезот во селото Бањска, со што бил блокиран влезот.
„Полициската станица во Звечан, по добиените информации упатила три регуларни единици во правец на споменатата локација. Штом пристигнале близу местото на пријавената блокада, наишле на отпор, во кој неколку луѓе пукале од различни видови оружје“, се наведува во соопштението и се додава дека се користени и рачни бомби.
Во меѓувреме, претседателката на Косово, Вјоса Османи, ја прекина официјалната посета на САД, каде престојвуаше во Њујорк, за да се врати во Приштина поради утринскиот напад на полицијата.
„Убиството на полицаецот и ранувањето на друг во северниот дел на Косово, кое е планирано, оркестрирано и извршено од српска криминална банда, е напад врза редот и законот во северниот дел на државата, тоа е напад на Косово. Овие напади повторно ја докажуваат дестабилизирачката моќ на криминалните банди, кои се организирани од Србија, и кои долго време, како што е докажано со нападите врз КФОР, новинарите и граѓаните, сакаат да го дестабилизираат Косово и регионот“, објави Османи на социјалната мрежа Фејсбук.
