Албанија: Бројот на случаи со Ковид-19 се зголеми на 584

ТИРАНА (АА) - Во Албанија откриени се уште 22 случаја на новиот вид коронавирус (Ковид-19), со што вкупната бројка на потврдени случаи во земјата се искачи на 584, меѓу кои се и починатите и излекуваните лица, пренесува Агенција Анадолија (АА).

Оваа информација преку соопштение ја потврди Министерството за здравство и социјална заштита на Албанија.

Во соопштението се вели дека во последните 24 часа тестирани се 233 сомнителни лица, од кои 22 биле позитивни на Ковид-19.

„Досега тестирани се 5.775 сомнителни случаи, од кои вкупно 584 се позитивни на Ковид-19. Моментално во земјата има 231 активен случај. Стапката на излекувани лица е повисока од стапката на активни случаи. Досега 26 граѓани починаа поради оваа пандемија“, се наведува во соопштението.

Се нагласува дека во последните 24 часа излекувани се уште 13 лица, со што вкупниот број на излекувани лица од Ковид-19 се зголеми на 327.