Husamedin Gina
15 Октомври 2020•Ажурирај: 16 Октомври 2020
СКОПЈЕ
Министерот за надворешни работи на Северна Македонија, Бујар Османи, истакна дека доколку не се одржи меѓувладината конференција во Бугарија предвидена за декември, тоа ќе биде заеднички неуспех и на Северна Македонија, и на Бугарија и на германското Претседателство, јавува Агенција Анадолија (АА).
Министерот Бујар Османи денеска одржа прес-конференција за преземените активности и организациски аспекти во рамките на македонско-бугарското копретседавање со Берлинскиот процес 2020 (БП-2020) и подготовките за завршниот Самит во Софија на 10 ноември 2020.
Осврнувајќи се на Берлинскиот процес 2020 (БП-2020), министерот Османи потсети дека идејата за иницијативата за Берлинскиот процес е поттикнување на регионална соработка и забрзување на европската интеграција на земјите од Западен Балкан.
Според него, неодржувањето на Берлинскиот процес ќе биде неуспех на сите учесници.
„Неодржување на меѓувладината конференција во декември е неуспех на процесот, и оттука товарот е на сите, и на нас како копретседавачи, и на Република Бугарија, но и на германското Претседателство, но се разбира и на сите учесници во Берлинскиот процес“, нагласи министерот за надворешни работи, Бујар Османи.
Околу изјавата на премиерот Зоран Заев дека граѓаните треба да се подготват дека може да нема почеток на преговорите со ЕУ во декември, поради несогласувањето на Бугарија, Османи рече дека ние прво треба да се навикнеме дека влегуваме во модус на постојани потреби од консензус на 27 земји членки.
„Јас мислам дека постои простор, постои разбирање од двете страни за важноста на моментот и постои капацитет преку интензивирање на комуникацијата, како што се случува сега, и на политичката и на таа на комисиите, да најдеме начин да се придвижиме во процесот“, рече Османи.
Османи исто така рече дека е убеден дека ќе се надминат недоразбирањата со Бугарија, особено за барањата кои задираат во македонскиот идентитет, односно во јазикот и нацијата.
На новинарско прашање за јавната дебата во бугарското Собрание за преименување на 24 мај од Ден на сесловенската во ден на бугарската азбука, Османи порача дека тоа е во спротивност со одредбите од Договорот за пријателство, добрососедство и соработка меѓу Република Северна Македонија и Бугарија и одлуките на комисиите за историја.
Во меѓувреме, заедничката комисија на експерти од Севрна Македонија и Бугарија по пауза од десет месеци, денес и утре се состанува во Скопје, за да разговараат за разликите во историјата.
