АНКАРА (АА) - Обилните врнежи од дожд, бурите и поплавите што ја зафатија американската држава Калифорнија предизвикаа смрт на три лица, известува Анадолу.

Според веста што ја објави Би-би-си, поради силната бура спроведена е евакуација на населението и затворени се патиштата во некои области на Лос Анџелес.

Властите работат на спасување на лицата заглавени во возилата поради надојдените води, а од вчера приближно 100.000 луѓе во државата немаат електрична енергија.

Американскиот центар за временски прогнози предупреди дека се можни голем број ненадејни поплави.

Властите објавија дека 64-годишен маж починал во среда во Сан Диего откако бил згмечен од паднато дрво. Друг маж на 70 години починал во понеделник во Мендосино откако брановите го однеле во океанот.

Во текот на викендот во поплавите во Рединг загина и 74-годишен маж.

Гувернерот на Калифорнија, Гевин Њусом, вчера објави дека е прогласена вонредна состојба во подрачјата на Лос Анџелес, Оринџ, Риверсајд, Сан Бернардино, Сан Диего и Шаста поради неодамнешните обилни дождови и бури што ја зафатија државата.

Тој истакна дека подрачјата оштетени од пожарот во јануари во регионот Пацифик Палисејдс се соочуваат со обилни дождови, поплави и свлечишта.