ИСТАНБУЛ (АА) – Цената на златото денес се искачи на рекордно ниво од 4.525,96 долари за една унца, што претставува раст од околу 1 отсто, поттикнат од загриженоста поради растечките тензии меѓу САД и Венецуела и очекувањата за дополнителни намалувања на каматните стапки од страна на Федералните резерви на САД, јавува Анадолу.

По достигнувањето на историскиот максимум, цената на златото се стабилизираше на околу 4.495,9 долари за една унца заклучно со 05:50 часот по Гринич, што претставува годишен раст од околу 72 отсто.

Цената на среброто, исто така, порасна за повеќе од 1 отсто и достигна 72,7 долари за една унца, што претставува историски високо ниво.

Во изминатите 12 месеци вредноста на среброто е зголемена за околу 144 отсто.

Побарувачката за таканаречени „сигурни засолништа“ е зголемена поради загриженоста за забавувањето на глобалниот економски раст, како и поради облозите за дополнителни намалувања на американските каматни стапки во 2026 година, особено по посилниот од очекуваното економски раст на САД во третиот квартал од годинава.

Бруто-домашниот производ (БДП) на САД порасна со годишна стапка од 4,3 отсто во третиот квартал, надминувајќи ги пазарните очекувања и бележејќи највисок раст во последните две години.

Во меѓувреме, тензиите меѓу Вашингтон и Каракас се зголемуваат откако САД ги засилија надзорните и спроведување на прописите против испораките на нафта поврзани со Венецуела, што предизвика нови стравувања од можни нарушувања во глобалните нафтени текови и ја зголеми геополитичката неизвесност на светско ниво.

Американскиот претседател Доналд Трамп тврди дека Венецуела ги користи приходите од нафта за финансирање нелегална имиграција и шверц на дрога кон САД.

Друга значајна причина за растот е купувањето злато од страна на централните банки за зголемување на резервите.