ДАМАСК/ИСТАНБУЛ (АА) - Во сириските покраини денес се организираа воени паради по повод првата годишнина од падот на режимот на Башар ал-Асад, а претседателот Ахмад ал-Шара присуствуваше на една од парадите во главниот град Дамаск, јавува Анадолу.

Сириската арапска новинска агенција (САНА) објави дека воени хеликоптери прелетале над Дамаск за време на воената парада организирана од страна на Министерството за одбрана на автопатот Мезе во главниот град.

Паради беа организирани и во јужниот град Дара, градовите Дума и Мисраба во околината на Дамаск и во централниот град Хама.

САНА соопшти дека 14 параглајдери прелетале над Дамаск над плоштадот Умајад за да ја одбележат годишнината од соборувањето на Асад.

Во Дамаск, како и во покраините Хама и Алепо во централна и северна Сирија, имало засилено безбедносно распоредување за обезбедување на јавните прослави по повод годишнината.

Во Алепо исто така беа организирани големи јавни прослави.

Сириската државна телевизија „Алихбарија“ денес објави дека околу 900.000 граѓани се вратиле преку копнени премини во Сирија по падот на Асад.

Асад, кој беше лидер на Сирија речиси 25 години, избега во Русија минатиот декември, со што стави крај на режимот на партијата Баас, која беше на власт од 1963 година. Новата преодна администрација на Шара беше формирана во јануари.