СКОПЈЕ/ТИРАНА/ПРИШТИНА (AA) - Лидерите на земјите од регионот упатија честитки по повод празникот Рамазан Бајрам, пренесува Анадолу.

Претседателката на Северна Македонија, Гордана Сиљановска-Давкова, по повод Рамазан Бајрам им го честита празникот на сите верници од исламска вероисповед во земјата, упатувајќи им најсрдечни желби.

Таа истакна дека Рамазан Бајрам претставува повеќе од традиционална прослава, оценувајќи го како израз на длабока вера, духовност, милосрдие, хармонија и љубов.

„Енергијата и топлината на светиот месец не се присутни само во исламските верски објекти и во домовите на нашите сограѓани од исламска вероисповед, тие се чувствуваат во целата заедница“, се наведува во пораката.

Претседателката исто така истакна дека во време кога светот се соочува со конфликти, војни, кризи и климатски промени, мирот и стабилноста се попотребни од кога било.

„Само со сплотеност, почитување и меѓусебно уважување можеме да градиме здраво општество и просперитетна татковина“, нагласи таа.

Сиљановска-Давкова повика духот на солидарност, емпатија и разбирање да се негува во текот на целата година, изразувајќи уверување дека предизвиците и тешкотиите можат да се надминат со силна волја и заедништво.

Исто така, и претседателот на Собранието на Северна Македонија, Африм Гаши, упати најискрени честитки и желби за добро здравје, мир, радост и благосостојба.

„Овој голем празник носи пораки за љубов, милосрдие и единство, вредности кои се особено важни за градење хармонично, праведно и достоинствено општество“, изјави Гаши.

Претседателот на Албанија, Бајрам Бегај, објави честитка на социјалните мрежи.

„По повод празникот Рамазан Бајрам, им честитам на сите верници од исламска вероисповед: нека ви е честит и благословен празникот и секогаш да имате благосостојба во вашите семејства. Нека вашиот пост и посветеност бидат прифатени. Нека овој празник биде ден на радост и солидарност за сите“, напиша Бегај.

Честитки упатија и премиерот Еди Рама, како и други официјални лица и политичари.

Претседателката на Косово, Вјоса Османи и премиерот Албин Курти, исто така, им го честитаа празникот на граѓаните по повод Рамазан Бајрам.

Во својата честитка, претседателката Османи ја нагласи важноста празникот да биде момент на приближување и обединување меѓу луѓето.

Таа изрази надеж дека молитвите и постот на верниците во текот на светиот месец Рамазан се прифатени, нагласувајќи дека Бајрам е ден кога се отвораат срцата и се зголемува чувството на дарежливост и солидарност во општеството.

Во меѓувреме, премиерот Курти во својата порака ја истакна важноста на благодарноста за благодетите и посветеноста кон другите, особено кон оние кои имаат помалку. Тој нагласи дека овој празник треба да служи како повик за поголема грижа, разбирање и ангажман за личен и општествен напредок.