ИСТАНБУЛ (АА) – Израелскиот премиер Бенјамин Нетанјаху изјави дека тековната војна на САД и Израел против Иран нема да биде бескрајна, јавува Анадолу.

„Нема да имате бескрајна војна“, изјави Нетанјаху за „Фокс њуз“.

Тој оцени дека уништувањето на иранскиот режим би го трасирало патот за „многу мировни договори“ со други муслимански земји во регионот.

„Ќе создадеме услови иранскиот народ да ја преземе контролата врз својата судбина, да формира сопствена демократски избрана влада, што ќе создаде поинаков Иран“, рече Нетанјаху.

Израелскиот премиер ја посочи Саудиска Арабија како земја која, според него, значително би профитирала од падот на актуелниот ирански режим.

„Ова е порта кон мир, кон поширок мир. И верувам дека можеме да го постигнеме тоа“, додаде тој.

Нетанјаху истакна дека соработката со американскиот претседател Доналд Трамп довела до „четири пробиви за мир“, алудирајќи на Абрахамските договори, односно четирите мировни договори со арапски земји.

„Сега, работејќи заедно против Иран, ќе можеме да донесеме многу, многу повеќе мировни договори. Ова не е бескрајна војна. Ова е порта кон мир. Тоа е токму спротивното од она што го зборуваат луѓето“, додаде Нетанјаху.

Во неделата, Трамп во видео објавено на неговата платформа „Трут соушал“ ги повика „сите ирански патриоти кои копнеат по слобода“ да го искористат моментот и „да си ја вратат земјата“.

Регионалните тензии ескалираа во саботата откако САД и Израел започнаа со големи напади врз Иран, при што се убиени неколку врвни ирански лидери, вклучувајќи го и врховниот лидер Али Хаменеи и воени официјални претставници.

Како одговор, Техеран возврати со напади со беспилотни летала и ракети насочени кон Израел, како и кон регионалните земји каде што се наоѓаат американски бази.

Шестмина американски војници се убиени, а неколку други се тешко повредени.

Според иранската Црвена полумесечина, бројот на жртви од воздушните напади на САД и Израел од саботата се искачи на 555, меѓу кои најмалку 165 ученички.