Северна Македонија ги повика своите државјани да се воздржат од непотребни патувања на Блискиот Исток

Министерството за надворешни работи и надворешна трговија на Северна Македонија повторно апелираше до сите државјани на Северна Македонија да се воздржат од непотребни патувања во поширокиот регион на Блискиот Исток, пренесува Анадолу.

Министерството во соопштение изјави дека со внимание и загриженост ги следи случувањата во поширокиот регион на Блискиот Исток, кои имаат директно влијание врз регионалната и меѓународната стабилност.

„Со оглед на очигледните обиди на Иран да нишани, покрај Израел, и повеќе арапски држави, вклучително и Обединетите Арапски Емирати, Катар, Кувајт, Бахреин, Саудиска Арабија, Либан и Ирак, како и британската воена база на територијата на Грчката администрација на Јужен Кипар, Министерството повторно апелира до сите државјани на Република Северна Македонија да се воздржат од непотребни патувања во поширокиот регион на Блискиот Исток“, се наведува во соопштението.

„Недвосмислено ги осудуваме сите напади врз нашите пријатели и партнери. Повредата на суверенитетот и нишанењето цивилни цели се неприфатливи и се во директна спротивност со основните принципи на меѓународното право. Мирот, безбедноста и стабилноста на Блискиот Исток не се апстрактни категории, туку суштински предуслови за глобалната стабилност“, соопшти Министерството.

Според соопштението, приоритет на Владата останува безбедноста и поддршката на македонските државјани кои по различни основи се наоѓаат во регионот и дека во текот на изминатиот период, надлежните дипломатско-конзуларни претставништва се во континуирана комуникација со нив.

„Министерството, во координација со дипломатско-конзуларните претставништва, разгледува повеќе можни сценарија за репатријација и евакуација, кои ќе бидат активирани кога тоа ќе го дозволат условите на терен и/или по повторно воспоставување на воздушниот сообраќај“, се вели во соопштението.