ИСТАНБУЛ (АА) – Бројот на жртви во смртоносниот пожар во Хонгконг што избувна во средата се зголеми на 146. Додека градот продолжува да жали за жртвите од најсмртоносниот пожар во градот во последните децении, сѐ ште не е јасен статусот на 150 лица, објавија локалните медиуми денес, известува Анадолу.

Во саботата во Хонгконг започна тридневна жалост во чест на жртвите од смртоносниот пожар во станбениот комплекс, во кој беа повредени и 79 лица, вклучувајќи 12 пожарникари, објави „Саут Чајна Морнинг Пост“.

Спасувачките операции продолжуваат 5-ти ден. Пожарите во зградите на станбениот комплекс Ванг Фук Корт се ставени под контрола.

Властите соопштија дека бројот на жртви од пожарот веројатно ќе се зголеми со извлекувањето на повеќе тела од зградите, при што околу 150 луѓе остануваат „недостапни“.

Пожарот избувна околу пладне во средата во комплексот згради, кој вклучува повеќе од 1.900 станови, и брзо се прошири поради бамбусовите скелиња поставени на надворешноста заради реновирање.

Комплексот се состои од осум кули и се проценува дека во нив живееле повеќе од 4.000 луѓе.

Полицијата приведе двајца директори и еден инженерски консултант од компанијата „Престиж констракшн енд инженеринг“ под обвинение за убиство од небрежност.

Властите велат дека бамбусовото скеле и материјалите од пенаста пластика што ја покривале надворешноста значително придонеле за брзото ширење на пожарот.

Во петокот, околу 800 жители засегнати од пожарот се преселени во хостели, хотели и преодни станови.

Поради инцидентот, за првпат во последните 17 години во Хонгконг бил издаден противпожарен аларм од ниво 5, највисок на петстепената скала во градот.