Кина: Назначувањето на Моџтаба Хаменеи е во согласност со Уставот на Иран

ИСТАНБУЛ (АА) – Кина соопшти дека назначувањето на новиот ирански врховен лидер Моџтаба Хаменеи е „во согласност со Уставот на земјата“, истовремено изразувајќи противење на какви било закани или напад на 56-годишниот верски лидер, јавува Анадолу.

Портпаролот на Министерството за надворешни работи, Гуо Џиакун, одговараше на прашање за одлуката донесена во неделата од иранското Совет на експерти, кое го прогласи Моџтаба за наследник на неговиот татко Али Хаменеи, кој беше убиен во воздушните напади на САД и Израел врз Техеран на 28 февруари.

Џиакун изјави дека Пекинг ги следел вестите за назначувањето, но не даде дополнителни коментари.

Моџтаба Хаменеи, верски лидер од среден ранг со блиски врски со Корпусот на Исламската револуционерна гарда, беше избран од 88-члениот Совет на експерти – тело што според иранскиот Устав е задолжено за именување на највисокиот политички и верски водач во земјата.

Со неговото назначување, Моџтаба Хамнеи (56) станува третиот врховен лидер на Исламска Република Иран од Исламската револуција во 1979 година.

Во меѓувреме, САД и Израел продолжуваат со голема воена кампања против Иран, која започна на 28 февруари и во која, според извештаите, убиени се повеќе од 1.250 лица, меѓу кои и врховниот лидер Али Хаменеи и 165 ученички.

Иран возврати со напади со беспилотни летала и ракети насочени кон Израел и земјите од Персискиот Залив, каде што се наоѓаат американски воени бази.

Кина се спротивставува на какво било надворешно мешање во внатрешните работи на други земји под каков било изговор, рече Гуо, кога го прашаа за коментарот на американскиот претседател Доналд Трамп дека новиот ирански лидер „нема да трае долго“ без „одобрување“ од неговата администрација.

„Суверенитетот, безбедноста и територијалниот интегритет на Иран треба да се почитуваат“, изјави Гуо, повторувајќи го повикот на Пекинг за „итен“ прекин на воениот конфликт и враќање на дијалогот.